Целата годишна количина од производството на најскапиот руски автомобил во историјата се продаде за само неколку дена.
Станува збор за моделот Senat на новата автомобилска марка Aurus, чие производство започна годинава. На почетокот од месецов, првите примероци пристигнаа во авто салонот во Москва за да и бидат понудени на јавноста, а за само неколку дена Aurus соопшти дека се продадени сите 350 примероци кои ќе бидат произведени годинава и дека се принудени да ја отворат листата на нарачки за наредната година.
Сето ова не би било чудно доколку не говориме за автомобил кој чини 24 милиони руски рубљи, односно околу 289.000 евра. Изгледа дека Русите многу сакаат да возат претседателска лимузина, но и гордоста на новата руска автоиндустрија. Затоа, не е за чудење што ја бирале исклучиво топ изведбата.
Лимузината е долга преку 5,6 метри, а естетски потсетува на Rolls-Royce. Автомобилот е блиндиран, има 4.4 литарски V8 мотор со моќност од 590 КС и 880 Nm, што е доволно 2,8 тони тешката лимузина да постигне максимална брзина од 250 км/ч и забрзување до стотка за околу 6 секунди.