Принцезата Шарлин од Монако, која на почетокот од ноември се врати по повеќемесечниот престој во родната Јужноафриканска Република, се лекува во здравствена установа, надвор од кнежеството, пренесе AFP.
„Принцезата Шарлин некое време беше отсутна. По враќање од Јужноафриканска Република примена е во здравствена установа во која закрепнува од емоционална и физичка исцрпеност“, изјави за AFP извор близок до палатата, потврдувајќи ја изјавата на принцот Алберт која за People потврди дека принцезата е под лекарски надзор.
„Таа сфати дека за неа е најдобро да се одмори и да биде под докторски надзор, но не во Монако, поради дискреција. Од истата причина не можам да ви кажам нешто повеќе. Уморна е, не само физички. Потребни ѝ се одмор и мир“, изјави Алберт за People.
Во соопштението за јавноста објавено на 16 ноември, палатата објави дека парот се сложил дека за што поуспешно закрепнување на принцезата потребни ѝ се мир и одмор. Според пишувањата на некои медиуми, поддршка за лекувањето и дава рускиот милијардер Владимир Доронин, кој наводно ѝ помага да ја преброди брачната криза.
„Шарлин и Владимир се во контакт и минуваат многу време заедно“, изјави извор за The Sun.
Поранешната врвна пливачка Шарлин Линет Витсток е родена во 1978 година. За принцот Алберт Втори од Монако се омажи во 2011 година и заедно имаат две деца.
Алберт е син на принцот Рене Трети и Грејс Кели, американска филмска ѕвезда која загина во автомобилска несреќа во 1982 година.
