Победничката на натпреварот за најубава мажена жена во Шри Ланка остана без круна бидејќи наводно била разведена, што не е според условите за учество во натпреварот.
Пушпика Де Силва ја доби титулата за најубава мажена жена во Шри Ланка, но нејзината радост траеше кратко време. Неколку минути по крунисувањето, победничката од 2020 година, Каролин Јури ја зеде круната тврдејќи таа не може да биде наградена со титулата бидејќи е разведена.
Сепак, од организаторите е потврдено дека госпоѓа Де Силва не е разведена. Судиите ја прогласија Де Силва за победник во финалето на натпреварот.
„Постои правило кое ги спречува жените кои биле мажени, па разведени да ја добијат наградата, па затоа круната ќе замине кај жената која го освои второто место“, изјави Јури пред судиите и публиката.
Потоа, таа грубо ја отстрани круната од главата на насолзената Де Силва, која пак си замина од сцената. Целиот инцидент е снимен и објавен на социјалните мрежи.
Организаторите ѝ се извинија на Де Силва која вели дека е разделена од сопругот, но не е разведена. На Facebook таа објави дека завршила во болница поради повреди на главата по инцидентот.
Вели дека ќе преземе легални дејства против неразумните навреди и начинот на кој се однесувале другите кон неа на сцената.
„Сè уште сум мажена жена. Вистинската кралица не е жена која ја зграпчува круната од главата на друга жена“, вели таа.
Организаторите се згрозени од однесувањето на поранешната мисица која грубо се нафрли на Де Силва и веќе полицијата ја испраша за инцидентот.
Овој натпревар за најубава мажена жена во Шри Ланка е голем настан во земјата, а меѓу гостите беше и сопругата на премиерот.