Овие меки и миризливи колачиња се декоративни, но и многу вкусни. Целото семејство ќе ужива во нивната подготовка и декорација.

Разубавете ги претстојните празници за себе и вашето семејство со прекрасни новогодишни колачиња. Овие задолжителни колачиња за празнична маса ќе донесат радост во вашиот дом.
Потребни состојки:
- 1 јајце
- 400 гр брашно
- 120 гр мед
- 110 гр кафеав шеќер
- 100 гр путер
- 60 мл вода
- 1 прашок за печиво
- ½ лажичка мелен ѓумбир
- ½ лажичка мелен цимет
- ½ лажичка мелено морско оревче
- ¼ лажичка мелено каранфилче
- неколку капки арома на ванила
за украсување:
- 1 белка од јајце
- 125 гр шеќер во прав
- сок од четвртина лимон
- бои за јадење
Подготовка:
Добро измешајте ги брашното, прашокот за печиво, ѓумбирот, циметот, морското оревче и каранфилчето. Со миксер изматете ги путерот, медот, шеќерот, водата, јајцето и неколкуте капки ванила. Полека додадете ја смесата со брашно и замесете тесто. Добиеното тесто поделете го на 2 дела и секој дел посебно завиткајте го во фолија. Оставете го во фрижидер 3 часа (може и подолго).
На работната површина ставете многу брашно и развлечете го тестото. Со модли исечете ги саканите форми и ставете ги на плех покриен со хартија за печење. Напомена: тестото, сукалото и модлите задолжително посипете ги со брашно за да не се залепи тестото! Печете ги бисквитите 10 минути на температура од 175 степени. Внимавајте да не ги препечете бидејќи се повкусни кога се меки. Добро изладете ги пред да почнете да ги украсувате!
Декорација:
Белките добро изматете ги, измешајте ги со шеќерот во прав и сокот од лимон. Поделете ја смесата и на секој дел додадете ја саканата боја. Ставете ги во различни кесички, исечете мала дупка и украсете ги добро изладените колачиња. За декорација можете да користите разни јадливи мониста. Оставете ги преку ноќ да отстојат пред да ги послужите.