Необичен проект е во тек во Сингапур – облакодер што би требало да биде највисоката монтажна зграда во светот.
Кулата висока 192 метри ќе се издигне во густо населениот Сингапур, но огромните делови од градбата се прават преку граница во Малезија.
Според BBC, во станбениот проект наречен Avenue South Residences што предвидува две паралелни кули, ќе има 988 станови.
Од компанијата која стои зад проектот, ADDP Architects, велат дека овој начин на изградба е познат како „Монтажна фабрички изработена волуметриска конструкција“ (PPVC) за која е потребен помал напор да се крене и произведува помалку отпад и бучава.
Поединечните модули се фабрички произведени во Синај и Малезија, каде низа шестострани кутии се излиени во бетон. Материјалот потоа се превезува до објект во Сингапур пред да биде преместен на градилиштето, објаснува Маркус Ченг Туан Хан, еден од соработниците и партнери на проектот.
„Ова е како концептот за производство на автомобили, но за градежната индустрија“, вели тој.
Има уште еден сегмент кој се покажа непредвидено поволен во време на пандемија – на градилиштето од ваков тип се потребни помалку работници.
„Полесно е да се контролира безбедната дистанца и логистичкото планирање во фабриката, отколку да ги имате таму сите работници“, вели Хан.
Индустријата на монтажни погони го доживеа првиот процут во Европа и Америка во повоениот период, а урбанистите ја користеа за брзо и соодветно решавање на проблемот со недоволно станбен простор.
Но, на пазарот за монтажни градежни материјали сега доминира Азиско-Пацифичкиот регион.
Изградбата на Avenue South Residences веќе е почната и се очекува да заврши до половината на 2023 година. Проектот е замислено да го надмине највисокиот монтажен погон во моментов во Сингапур и во светот - Clement Canopy – кој е висок 140 метри и исто така е дело на ADDP Architects.
