Натпреварот од последното коло во Лигата на нации македонската фудбалска репрезентација ќе го игра во Никозија, а причина е војната во Нагорно-Карабах.
УЕФА дефинитивно не дозволува Ерменија да игра натпревари на домашен терен. Иако тамошното првенство е во тек, поради војната во Нагорно-Карабах во соседен Азербејџан репрезентацијата на Ерменија ќе мора да продолжи своите натпревари како домаќин да ги игра на неутрален терен.
„Уште не е потврдено, но 99% натпреварот против Ерменија ќе се игра на Кипар, поточно во Никозија. УЕФА синоќа испрати допис до нас за таквата одлука наведувајќи дека накнадно ќе треба да биде потврдена“, изјавија од ФФМ за Кајгана.
Ерменците минатиот месец против Грузија беа домаќини во полскиот град Тихи.
Македонија прво ја очекува историскиот бараж против Грузија за пласман на ЕУРО кој ќе се игра на 12-ти месецов во Тбилиси. Победникот ќе избори пласман.
Три дена подоцна во Скопје ја пречекуваме Естонија во претпоследното коло од Лигата на нации, а на 17-ти очигледно патуваме за Кипар на мегдан со Ерменија.
Селекторот Игор Ангеловски списокот на повикани играчи најави дека ќе го соопшти в петок.
