Мажот кој во петокот избоде до смрт две лица во Турку, град во југозападниот дел на Финска, е осумнаесетгодишен Мароканец, соопшти полицијата, која отвори истрага за тероризам.
“Нападот на почетокот беше оценет како убиство, но добивме информации во текот на ноќта дека станува збор за кривично дело убиство со терористички мотив”, се вели во соопштението на полицијата.
Властите официјално го идентификуваа осомничениот како “осумнаесетгодишен марокански државјанин”, без наведување други детали. Полицијата веднаш го уапси осомничениот со нож во петокот, погодувајќи го со куршум во ногата на плоштад во центарот на Турку.
Мароканецот избоде до смрт две лица, фински граѓани, а меѓу осуммината повредени се и еден Италијанец и двајца Швеѓани.
Исламска држава ја презеде одговорноста за вчерашниот напад во рускиот град Сургут во Сибир, објави новинската агенција Амак, блиска до оваа џихадистичка група.
Седум лица беа повредени кога непознат човек нападна минувачи со нож, по што полицијата го уби. Од седумтемина повредени во нападот, двајца се во критична, а вкупно четворица во тешка состојба.
Руските истражители претходно го идентификуваа напаѓачот како локален жител со ментални проблеми и изразија скептицизам околу тврдењата на Исламска држава.