Свет

Нападот во Нов Зеланд е терористички, бројот на загинати порасна на 49

15. март 2019 - 10:45 | Б.С.Б.

Премиерката на Нов Зеланд, Џакинда Ардерн изјави дека безмилосниот напад во кој загинаа најмалку 49 луѓе, а 20 се тешко ранети, може да се опише само како терористички чин.

Меѓу загинатите во двете нападнати џамии има и тинејџери.

„Овие два напада се добро испланирани. Две експлозивни направи биле поставени на автомобилот на осомничените, но ние ги откривме и ги деактивиравме. Четворица се уапсени и се во притвор. Еден од нив изјави дека е австралиски државјанин роден во таа земја. Тие имаат екстремистички погледи за кои нема место во Нов Зеланд, но ни во светот. Иако немаме причина да веруваме дека има и други осомничени, не ја изземаме таа можност во овој момент. Известувачката служба и полициските агенции ги активираа сите нивни ресурси на располагање, а во областа ќе се испратат и дополнителни полицајци“, изјави премиерката.

Според Мајк Буш, комесар во новозеландската полиција, бројот на загинати е искачен на 49. На луѓето им е порачано да не излегуваат од домовите.

„Знаеме дека во моментов има семејства кои се разделени, но ве молиме да ги слушате упатствата од полициските службеници и надлежните, поради вашата лична безбедност“, изјави премиерката.

Нападот во џамиите се случи во 19 часот по локално време во Крајстчрч, во текот на петочната молитва.

Коментирај