Нема повеќе стадион „Сан Паоло“ во Неапол. Од денеска стадионот на кој настапува тимот на Наполи ќе го носи името на својот легендарен играч, Диего Армандо Марадона.
Градскиот совет на Неапол едногласно ја одобри резолуцијата за преименување на најголемиот стадион во градот во чест на аргентинската ѕвезда. Стадионот не е во сопственост на клубот, туку на градот, за затоа требаше одобрение од градските власти.
Резолуцијата ја предложи градоначалникот Луиџи Де Маџистрис и тоа само неколку часа по веста дека Марадона почина.
Диего Марадона остнави траен белег во тимот од Кампанија. Осум сезони беше дел од клубот играјќи 259 натпревари во сите натпреварувања збогатени со 115 голови. Во последните 15 месеци, односно втората половина од сезоната 1990/91 како и целата наредна 1991/92 ги мина под суспензија откако падна на тест за кокаин.
Сепак, Марадона на „Партенопеите“ им ги донесе единствените две Скудета во историјата на клубот во 1987 и 1990 година. Воедно, ги освои и Копа Италија (1987), УЕФА Купот (1989) и италијанскиот суперкуп (1990).
Стадионот „Сан Паоло“ е пуштен во употреба на 6 декември 1959 година, реновиран е во 1990 и последен пат лани. Има капацитет од 54.726 гледачи. Првично се викал „Дел Соле“, односно стадион на сонцето, а името според патронот на градот го добил во 1963 година. Нагалено го викаат уште и „Фуоригрота“.