УЕФА денеска ја направи жрепката за завршниот фајнл-фор турнир во Лигата на нации 2022/2023, а очекувано фортуната донесе две интересни пресметки.
Без разлика кој со кого и да се паднеше, дуелите ќе ветуваа неизвесност и вистиснка фудбалска пресметка. Сепак, жрепката во Нион одлучи домаќинот на турнирот, Холандија, да се пресмета со бронзената од последниот Мундијал, Хрватска, додека во второто полуфинале ќе се игра вистинско дерби помеѓу Шпанија и Италија.
Полуфиналните натпревари ќе се играат во среда и четврток на 14 односно 15 јуни годинава, двата со почеток во 20:45 часот. Холандија и Хрватска ќе играат на стадионот „Де Кујп“ во Ротердам, додека Шпанија и Италија на „Де Хролс Весте“ во Енсхеде.
Натпреварите за медалите ќе следуваат в недела на 18 јуни. Прво од 15 часот во Енсхеде ќе се сретнат двете поразени репрезентации од полуфиналните натпреаври, а потоа од 20:45 во Ротердам ќе биде големото финале кое ќе го даде третиот победник во Лигата на нации.
За потсетување, првото издание на фајнл-фор на Лигата на нации го освои Португалија во 2019 година, кога беше и домаќин на завршниот турнир, додека во 2021 победник беше Франција, а домаќин Италија. Со оглед на тоа што ниту Португалија ниту Франција не обезбедија пласман на овогодишниот фајнл-фор, ова прилично ново натпреварување на УЕФА ќе добие нов победник.
