НАСА денеска ќе го тестира летот на минијатурниот хеликоптер Ingenuity на површината на Марс, што ќе биде првиот лет на какво било летало контролирано од друга планета.
Ако сè оди според планот, хеликоптерот со тежина од 1,8 килограми полека ќе се искачи на висина од 3 метри над површината на Марс, ќе остане да лебди 30 секунди, а потоа ќе се движи пред да се приземји на сите четири нозе.
Се очекува податоците коишто ќе го потврдат исходот до НАСА да стигнат по три часа.
Летот ќе се одржи на површината на кратерот Језеро. Од НАСА се надеваат дека фотографиите и видеата од тест летот ќе се добијат од камери поставени на хеликоптерот и на роверот, којшто ќе биде паркиран на оддалеченост од 76 метри.
Ако успее овој лет, во наредните недели ќе има подлоги летови, иако хеликоптерот ќе мора да одмори четири до пет дена за да ги наполни батериите.
Иако Марс поседува многу помала гравитација од Земјата, неговата атмосфера е до стотина пати со помала густина отколку на Земјата, што претставува посебен предизвик за лет.
Малиот хеликоптер веќе успеа да ги издржи ноќните температури на Марс, кои паѓаат и до 90 степени под нулата, користејќи ја опремата за соларна енергија за полнење и одржување на внатрешните компоненти со правилно загревање.