Американската вселенска агенција НАСА ја покажа ракетата SLS која наскоро ќе биде спремна за мисија на Месечината.
Ракетата SLS ќе биде поставена на лансирната рампа во вселенскиот центар Кенеди на Флорида, каде ќе биде извршено тест одбројување. Доколку сè мине според планот, ракетата ќе биде официјално прогласена подготвена за мисија во која капсулата за тестирање ќе биде испратена на пат околу Месечината, без екипаж.
Тоа би можело да се случи во наредните неколку месеци.
Во НАСА се надеваат дека со помош на SLS ракетата ќе испратат астронаути на месечината во втората половина на оваа деценија.
Ракетата SLS е висока 100 метри и е дизајнирана да биде посилна од Apollo Saturn, ракетата од крајот на 60-тите и почетокот на 70-тите години од минатиот век. Ќе има доволно сила да испрати астронаути далеку од Земјата, како и многу опрема и товар потребен за екипажот да остане во мисија подолг временски период.
Ова е деби за ракетата SLS со оглед на фактот дека јавноста за првпат ги виде сите нејзини компоненти откако е составена. Тестот најверојатно ќе се изврши на 5 април, кога ќе биде наполнета со гориво за да се изврши тестно одбројување. Првата можност за лансирање е кон крајот на мај.
