Пред само три дена компанијата Tesla на Елон Маск испрати црвена Tesla Roadster на лет во вселената, заедно со кукла во астронаутски костум наречена STARMAN, а веќе денеска NASA ја заведе Tesla-та како небески објект.
Црвената Tesla Roadster е регистрирана како „вселенско летало“ и сега бесплатната реклама на Елон Маск може да се види дури и на официјалната веб-страна на NASA.
Доколку не му верувате на обичен текст напишан на веб-страната која сега ја посетувате, можете во ова да се уверите и самите. Отидете на веб-страната на NASA HORIZONS, стиснете на опцијата „change“ веднаш до подменито Target body, напишете „SpaceX“ во празното поле и притиснете Enter. Веднаш потоа кликнете на „Generate ephermis“.
Тука ќе ги најдете сите детали за автомобилот, од неговата тежина до времетраењето на летот, заедно со неговиот ефермис, односно позицијата на небото. HORIZONS е истиот систем кој ја евидентира положбата на сите небески тела: Сонцето, Месечината, сателити, Марс и слично.
Она што ќе го пронајдете на официјалниот лист со податоци на NASA е дека автомобилот дури и крие неколку тајни кои претходно не ни беа откриени. Во Roadster-от се крие и мини модел на Tesla, направен од Hot Wheels, а и во него има мини STARMAN. Покрај тоа, автомобилот содржи и копија од серијата книги „Foundation“ на Исак Асимов, кои се сместени на хард диск.
Заедно со координатите има и предупредување, кое вели: „Грешките во предвидувањето на положбата можат да се зголемат со тек на време поради непредвиден сончев притисок, термална радијација и забрзувања на објектот кои не се предвидени“.
