Наука

НАСА објави фотографија од местото каде падна израелското летало на Месечината

16. мај 2019 - 11:57 | Б.С.Б.

Американската вселенска агенција НАСА објави фотографии од местото на Месечината каде се сруши израелското летало Beresheet.

Леталото падна на површината на Месечината во текот на слетување изминатиот месец, а црно-белите фотографии го прикажуваат местото пред и по падот.

Lunar Reconnaissance Orbiter на НАСА ја направи фотографијата од местото на падот на 22 април, на 90 километри над површината. Забележена е темна дамка широка околу 10 метри. Дамката не е забележана на фотографиите од истата локација, направени минатата година.

Beresheet требаше да биде првото израелско летало финансирано со приватни средства на Месечината. Досега, тоа им успеа на Русите, Американците и Кинезите, чии летала успешно слетаа.

Коментирај