Можеби не можеме да скокнеме во вселенски брод и да тргнеме во истражување на ѕвездите и планетите, но секогаш може да го следите Instagram профилот на НАСА каде вселенската агенција редовно објавува спектакуларни фотографии и снимки од нејзините мисии во вселената.
Најновото задоволство се новите фотографии од планетата Јупитер, снимени од мисијата Џуно во периодот од октомври до декември минатата година. Вселенското летало било оддалечено само еден дијаметар од џиновската планета кога биле снимени фотографиите, соопшти НАСА.
Оригиналните и преработените фотки од мисијата се достапни на веб страницата на НАСА.
„Секое ново орбитирање нѐ доближува до срцето на радијацискиот појас на Јупитер, а засега вселенското летало успева да ја издржи бурата од електрони околу Јупитер многу подобро отколку што очекувавме“, вели Рик Нибакен, проект менаџер на мисијата Џуно.
Фотографиите на прв поглед изгледаат како уметнички слики, а всушност гледате во дивите, турбулентни облаци во атмосферата на Јупитер.
Научниците Џералд Ајхштад и Шон Доран ги преработија оригиналните фотографии со програмата JunoCam за да доловат пореална слика.
Џуно беше лансиран во 2011 година за да собира податоци за атмосферата, температурата и облаците на Јупитер. Со анализа на овие податоци, ќе може подобро да ги сфатиме потеклото на планетата и целиот Сончев систем, велат научниците на НАСА.