НАСА објави неколку снимки направени од вселенскиот телескоп James Webb на кои се гледа спојување на две галаксии.
Процесот на спојување е опишан како еден вид космички балет, а снимката е објавена по повод втората годишнина од претставувањето на првите научни резултати од работата на орбиталната опсерваторија.
Двете галаксии на сликите се наоѓаат на 326 милиони светлосни години од Земјата, во соѕвездието Хидра. Светлосна година е растојанието што светлината го поминува за една година, или 9,5 илјади милијарди километри.
„Гледаме две галаксии, секоја кластер од милијарди ѕвезди. Галаксиите се во процес на спојување. Ова е нормален начин на кој галаксиите како нашата еволуираат со текот на времето, за да растат од мали галаксии - како оние што Webb ги најде непосредно по Големата експлозија - во зрели галаксии како нашиот Млечен Пат“, рече научник од мисијата James Webb.
Webb, кој започна со работа во 2021 година и почна да собира податоци следната година, го промени разбирањето на раниот универзум со неверојатни слики од космосот.
Откако стана оперативен, Webb набљудуваше галаксии исполнети со ѕвезди кои се формираа во рок од неколку стотици милиони години од Големата експлозија, која го означи почетокот на универзумот пред околу 13,8 милијарди години.
Спојувањето на галаксиите Пингвин и Јајце се колективно познати како Arp 142. Тие се прикажани на сликите како споена маглина која е мешавина од ѕвезди и гас.
Нивната интеракција, според НАСА, била иницирана пред околу 25 до 75 милиони години и се очекува да стане единствена галаксија во следните неколку стотици милиони години.
