Американската вселенска агенција НАСА синоќа избра 10 нови астронаути, а половина од нив се воени пилоти кои сонуваат за Месечината и Марс.
Вселенската агенција претстави 6 мажи и 4 жени на церемонијата во Хјустон, каде што се наоѓа Контролата на мисијата и Корпусот на астронаутите.
На конкурсот пристигнаа повеќе од 12.000 апликации, а избраните 10, кои се на возраст меѓу 30 и 40 години, ги чека двегодишна обука за да се квалификуваат за лет во вселената.
„Секој од нив има одличен склоп од неопходни квалитети, но заедно го отелотворуваат кредото на нашата земја: E pluribus unum – еден од многуте!“, рече шефот на НАСА, претставувајќи ги идните астронаути.
Покрај воените пилоти, кандидати за астронаути вклучуваат медицински физичар, поморски роботичар, оператор на НАСА кој го лансираше Space X и биоинженер кој бил шампион во велосипедизам. Со нив ќе тренираат двајца астронаути од Обединетите Арапски Емирати.
Од 1959 година НАСА има примено 360 луѓе во својот астронаутски корпус, кога избра седумина за летот со првиот американски вселенски брод во рамките на проектот „Меркур“. Претходниот избор на астронаути беше во 2017 година.
Со тоа што Space X испраќа астронаути до Меѓународната вселенска станица и други приватни компании кои организираат кратки туристички летови, како и програмата на НАСА за слетување на Месечината, „живееме во златното доба на човечките вселенски летови“, рече главниот астронаут на НАСА, Рид Вајсмен.
НАСА планира повторно да испрати астронаути на Месечината најдоцна во 2025 година.