Настапот на Селин Дион во Ријад го „запали“ интернетот

Селин Дион беше една од ѕвездите кои синоќа настапија на ревијата во Ријад на која се славеше 45 години работа на познатиот либански моден дизајнер Ели Сааб, а снимките од настапот на легендарната пејачка ги освоија социјалните мрежи.

По настапот на отворањето на Олимпијадата во Париз, кој го одбележа враќањето на Дион во музиката по долгогодишна пауза поради битката со синдромот на вкочанета личност, синоќешниот настап беше еден од ретките што таа ги има дадено оттогаш.

Пејачката на црвениот тепих пристигна во цветен фустан кој беше токму креација на Сааб, а за настапот се појави во долг фустан со светки во боја на кожа.

Таа последна излезе на пистата, по Џенифер Лопес, Камила Кабељо, Ненси Ајрам и Амра Диаб, а всушност нејзиниот настап беше круна на целото шоу, трансформирајќи ја енергијата како што само таа може.

Дион отпеа две песни за да го затвори шоуто. Таа првпат ја изведе „The Power of Love“, песна на Џенифер Раш од 1984 година, која стана хит откако таа ја обработи во 1993 година.

Таа потоа отпеа арапски ремикс на хитот од 2002 година „I'm Alive“, вториот сингл од нејзиниот албум „A New Day Has Come“, кој доби ново значење за обожавателите по нејзината борба со болеста.

Снимките од овој настап ги преплавија социјалните мрежи, а многумина беа воодушевени од нејзината енергија и настап, со оглед на тоа дека таа сè уште се бори со болеста.