Висок функционер на НАТО ги потсети САД, дека имаат обврска да го почитуваат принципот на взаемна одбрана, во случај на агресија на една од земјите членки на Алијансата.
Ова следуваше како одговор до САД, откако претседателот Доналд Трамп, неодамна изнесе свои сомнежи во врска со Црна Гора.
„Клаузулата за колективна одбрана на НАТО, член 5 (Повелба), е безусловна и е исто како од армиран бетон. Тоа значи дека напад на една наша членка, претставува напад на сите нас“, изјави за светските медиуми неименуван висок функционер на Алијансата.
Овој функционер додаде дека Трамп, на неодамнешниот самит во Брисел, зборувал за тоа како САД во целост се подготвени да ги почитуваат своите обврските кон НАТО, како и тоа дека сојузот е силен.
Трамп во изјава за „Fox News“, емитувана во вторникот навечер, ја доведе во прашање взаемната одбрана на членките, доколку една од нив биде нападната.
Американскиот претседател истакна дека „Црна Гора е многу мала земја со многу агресивни луѓе“, чија агресивност може да предизвика и Трета светска војна.
Црна Гора во пролетта 2017 година, стана 29 земја членка на НАТО Алијансата.
Владата на Црна Гора, во реакција на изјавата на Трамп, соопшти дека е горда на својата традиција и мирољубива политика, како и дека Црна Гора придонесува за мирот и стабилност во Европа и целиот свет воопшто.
За потсетување, Трамп веќе имаше „непријатен“ однос кон Црна Гора, уште на првиот НАТО самит во мај 2017 година, кога го турна црногорскиот премиер Душко Марковиќ, за тој да застане во прв ред пред камерите.
