Научниците успеаја да клонираат глувци од исушени и замрзнати клетки на кожа за првпат во историјата. Оваа постапка може да биде чекор напред во заживување на популациите на загрозените видови.
Тоа значи дека тие би можеле да складираат клетки од кожата на различни животни како еден вид осигурување во случај да им се заканува исчезнување. Имено, многу загрозени видови се парат со роднини, што го зголемува ризикот од вродени дефекти. Дополнително, губењето на генетската разновидност може да ги направи животните поранливи на многу други закани, како што се болестите.
Досега, научниците чуваа замрзнати клетки за клонирање во течен азот, што е скапо и ризично. Во случај да дојде до прекин на струја или да не се надополнува редовно течниот азот, клетките почнуваат да се раствораат и стануваат неупотребливи. Лиофилизирана (сушена и замрзната) сперма, исто така, може да се користи за создавање клонови, но не може да се добие од сите животни.
Може да се искористи за создавање женки кај загрозените видови каде што остануваат само мажјаци
„Ако можеме да ги зачуваме потребните клетки без течен азот користејќи технологија за сушење со замрзнување, тоа ќе овозможи евтино и безбедно складирање на генетски ресурси од целиот свет“, вели биологот Терухико Вакајама од Универзитетот Јаманаши во Јапонија, како што пренесува The Guardian.
„Земјите во развој ќе можат да складираат вредни генетски ресурси во своите земји. Исто така, оваа технологија може да се користи за создавање женки во оние загрозени видови каде што остануваат само мажјаци“, додаде тој.
Во новата студија, научниците ги замрзнаа исушените клетки од кожата од опашките на глувци и ги складираа до девет месеци пред да се обидат да создадат клонови од нив. Процесот на сушење со замрзнување ги уби клетките, но експертите открија дека сè уште можат да создадат клонирани ембриони со вметнување на мртвите клетки во денуклеираните јајца на глувчето.
Ембриони на глувци во рана фаза, познати како бластоциста, беа користени за да се создаде снабдување со матични клетки кои беа подложени на вториот круг на клонирање. Матичните клетки беа вметнати во енуклеираните јајца од глувчето, што доведе до ембриони кои сурогат глувците ги носеа до крај.
Пo pрвиот клониран глушец, наречен Дорами, следеле уште 74. За да тестираат дали клоновите се плодни, научниците помешале девет клонирани женки и три мажјаци со нормални глувци. Сите женки имаа легла.
Има еден недостаток - процесот е прилично неефикасен
Но, и покрај толку големото достигнување, процесот е прилично неефикасен. Имено, сушењето со замрзнување значително ја оштетило ДНК во клетките на кожата, а стапката на успех за создавање здрави женски и машки младенчиња била само 0,2 до 5,4%. Во некои клетки, Y-хромозомот бил изгубен, поради што од машки клетки биле создадени женски клетки.
„Ако истиот третман би можел да се спроведе кај загрозените видови каде што преживеале само мажјаците, би било можно да се создадат женки и да се зачува видот по природен пат“, наведуваат научниците.
Генетичарот Алена Панс од Универзитетот во Хертфордшир рече дека способноста за складирање на генетски материјал е исклучително важна за зачувување на видовите и нивната генетска разновидност. Но, таа додаде дека е уште поважно, ако сакаме долгорочно решение, да постигнеме дека клетките исушени со замрзнување можат да се чуваат на неодредено време.
Истражувањето Healthy cloned offspring derived from freeze-dried somatic cells беше објавено во Nature Communications.