Научниците веруваат дека кај птиците и цицачите постојат повеќе од 1,6 милиони вируси кои се уште не се откриени. Околу една половина од нив би можела да ги зарази луѓето. Тим на научници од целиот свет одлучи да идентификува нови вируси пред тоа да се случи.
Проектот кој го носи називот „Global Virome Project“, чии цели неодамна бea објавени во магазинот „Science Magazine“, претставуваат иницијатива која би требало да открие непознати вируси кои се наоѓаат на Земјата.
Со откривање на вируси кои се наоѓаат кај животните, а кои потенцијално би можеле да преминат кај луѓето, научниците предвидуваат дека би можеле да го спречат тој процес.
Познавајќи го непријателот од друга страна, човештвото би можело да биде далеку поспремно во решавање на епидемијата на смртоносни вируси, па така проектот би можел да стане клучен во решавање на следни пандемии.
Бројот на вируси за кои сега се знае е помал од 0,1 отсто, во однос на вкупниот број на потенцијални вируси.
Извршната директорка на Универзитетот Дејвид во Калифорнија, инаку главното седиште каде е започнато ова истражување, Јона Мезет, вели дека е време да почнеме да се однесуваме проактивно.
„Мораме да ги идентификуваме идните закани и да ги преземеме потребните чекори со цел да спречиме следна пандемија“, вели таа.
Проектот „Global Virome“, во текот на следната деценија, ќе работи на идентификација на околу 70 отсто од потенцијалните закани.
Постојат неколку клучни информации кои научниците треба да ги знаат за вирусот, за да можат да воспостават негов „еколошки профил“: Од каде потекнува, кога може да заразува и како се пренесува.
Колку побргу ќе се дознаат овие карактеристики, толку побргу медицинските експерти ќе можат да сфатат кај кои луѓе постои најголем ризик од болести за кои се уште не знаеме ниту дека постојат.
Благодарение на значајното финансирање и ангажманот на научници од целиот свет, проектот „Global Virome“ има потенцијал да постигне далеку повеќе од она што било зацртано на почетокот.
