Науката со децении се обидува да ги открие тајните на работата на човечкиот мозок, па затоа често се сретнуваат случаи каде научници решаваат да создадат клон, односно нивна верзија на мозокот. Рускиот научен фонд тукушто објави дека еден од таквите експерименти завршил со особен успех.
Група научници од државниот универзитет Петрозаводск креираа невронска мрежа од наједноставни вештачки неврони и научниците ја научија да препознава геометриски фигури и слики, соопшто прес службата на рускиот научен фонд.
Современите компјутери работат на база на наједноставна дискретна логика – нивните елементарни мемориски ќелии и компјутерски модули можат да перцепираат и обработуваат само нули и единици. Тоа им пружа неограничени можности за математички пресметки со доволен број од едните и другите елементи.
Научниците уште одамна знаат дека мозокот функционира на различен начин. За разлика од полуспроводните транзистори, нашите неврони можат истовремено да перцепираат голем број различни сигнали, да ги симулираат на комплексен начин и да ја менуваат својата чувствителност на поединечните збирови на такви импулси.
Невронската мрежа е всушност вештачки пандан на ланецот на неврони, и затоа е многу тешка за креирање. Ланецот на неврони е премногу комплексен за прикажување во полна форма, па затоа научниците често се решаваат да ја поедностават нивната конструкција, што ги прави недоволно добри пандани на човечкиот или мозокот на другите живи суштества. Покрај сите останати предизвици, ваквите подвизи можат да се направат само со помош на најмоќните суперкомпјутери во светот.
Поради тоа Андреј Величко, како и други физичари и научници од целиот свет, од поодамна се обидуваат да создадат вештачки неврони. Неодамна руските научници создадоа вештачки неврони составени од тенки филмови на ванадиум-диоксид, чија отпорност зависи од нивната температура. На пример, ако низ таквиот неврон се пропушти доволна количина на струја, тој ќе се загрее и неговата отпорност нагло ќе се намали за околу 10.000 пати, поради што ќе почне да пренесува повеќе струја. Тоа ќе доведе до ладење на вештачкиот неврон, негово враќање во почетната состојба и скоро потполн прекин на движењето на електричната енергија. Како резултат на тоа, ваквиот филм ќе осцилира, емитувајќи енергија низ невроните на сличен начин како кај луѓето и животните.
Како што откриваат Величко и неговите колеги, вкупно 11 слични структури комбинирани во една мрежа која се состои од две влезни и излезни чворови и девет неврони за обработка можат да научат да препознаваат едноставни геометриски форми кои можат да се постават во квадрат со големина од 3х3 пиксели.
Овие експерименти покажаа дека вештачките неврони базирани на ванадиумски филмови можат да регистрираат и обработуваат повеќеслојни сигнали, исто како и природните неврони, што им овозможува да се употребуваат како нивни полноправни пандани.