Научници од московскиот Институт за физика и технологија, со помош на колеги од Швајцарија и САД, направија нешто што се противи на законите на физиката. Со помош на квантен компјутер успеаја да го променат текот на времето.
Користејќи електрони и принципи на квантната механика истражувачите успеаја да го вратат времето. Поточно, кој и да го набљудувал компјутерот ќе ги видел настаните како времето да се вратило неколку секунди наназад. Ова откритие не само што ќе ги промени нашите сфаќања и употребата на квантните компјутери, туку и некои закони на физиката.
Истражувањето е објавено во списанието Scientific Reports и во него се наведува дека е користен квантен компјутер IBM. Водач на истражување е доктор Горди Лесовик, кој истакнува дека тој и неговите колеги вештачки создале состојба која се развива во насока спротивна од таа во која се движи термодинамичката стрела на времето.
Во текот на експериментот истражувачите откриле дека ако користат два кубита остваруваат успех во 85 проценти од случаите. А, кога ќе додадат уште еден кубит, се појавуваат грешки, па процентот на успешност се намалува.
Сега, научниците се надеваат дека ќе успеат да изработат алгоритам со кој би опфатиле уште кубити и ќе се намали бројот на грешки, односно ќе се зголеми прецизноста.