Научници од Универзитетот во Колорадо веруваат дека го открија местото со најчист воздух во светот, без честички произведени од човечка активност. Подрачјето се наоѓа над Јужниот Океан околу Антарктикот.
Во првиот научен труд за биоаеросолниот состав на тој океан, истражувачите од Универзитетот откриваат атмосферска област што едноставно не е чепната од човекот.
Времето и климата се тесно поврзани и го поврзуваат секој дел од светот. Климата се менува брзо како резултат на човековите активности, па научниците и истражувачите веќе некое време се трудат да најдат катче на Земјата што не е зафатено од луѓето.
Тоа се наоѓа кај воздухот од граничниот слој којшто ги храни долните облаци над Јужниот Океан. Таму нема аеросолни честички создадени со човечка активност, како што е горење фосилни горива, садење земјоделски култури, производство на ѓубрива, отпадни води, или пак, сообраќајот.
Истражувањето, објавено во Proceedings of the National Academy of Sciences, открива дека Јужниот Океан околу Антарктик е вистинското место ако навистина сакате свеж воздух. Човечкото влијание е неизбежно на повеќето места на Земјата. Отпадот што го оставаме може да биде присутен и во најоддалечените области на Океанот, бидејќи на секои неколку дена на оддалечените плажи на кои не ни живеат луѓе, водата исфрла многу пластика. Хемикалиите кои ги произведуваме се насекаде околу нас, но не и далеку на југ.
Научниците зеле примероци од водата, како и примероци од атмосферата над Океанот. Го изучувале составот на микробите најдени во воздухот и откриле дека микробите веројатно потекнуваат од океанот. Значи, Јужниот Океан е доволно далеку од човечката цивилизација за да избегне загадување.
