Дали Земјата ја шпионираат вонземни сонди? И покрај тоа што засега веројатноста за такво нешто е минимална, не би било лошо доколку се ипратат наши сонди, чисто за да бидеме сигурни.
Физичарот и СЕТИ истражувач Џејмс Бенфорд смета дека блиските астероиди кои имаат слична орбита како Земјата се идеално место за шпионажа. Неговото мислење под наслов „Looking for Lurkers“ го објави реномираното списание Astronomical Journal во своето септемвриско издание.
„Сонда лоцирана на блиско растојание од нас би можела да си работи додека нашата цивилизација не развие технологија со која ќе ја пронајде, а штом би оствариле контакт би можело и да се оствари конверзација во реално време“, пишува Бенфорд.
Тој не само што нуди можни места за вонземни сонди, туку и дава предлози како истражувачите би можеле да пронајдат докази за вонземна технологија, од употреба на оптички и радио телескопи до праќање на летала.
Многумина сметаат дека Месечината е перфектно место за вонземна шпионажа, но Бенфорд не се согласува со тоа. Според него, тоа што дел од нејзината површина две недели е во целосна темница би го лишило секое летало од извор на сончева енергија поради што функционалноста би му била намалена. Додава и дека поставувањето сонди премногу близку до Земјата не би им одело во прилог на вонземјаните кои најверојатно би претпочитале да останат неоткриени.
Најблискиот астероид кој има слична орбита со векови ќе се движи блиску до Земјата. Ваквите тела за Бенфорд се идеални за вонземни шпионски сонди токму поради долготрајноста на сличната орбита.
Самиот физичар потенцира дека теоријата е малку веројатна, но сепак возможна. Но, не губиме ништо доколку се потрудиме да ѕирнеме што има таму, можеме само да добиеме.
„Доколку не најдеме ништо, тоа ќе значи дека никој не дошол да бара живот на Земјата. Тоа би било изненадување, навистина неверојатно“, вели тој.
И Пол Дејвис, физичар и астробиолог при Државниот Универзитет во Аризона, се сомнева дека би се пронашла вонземна технологија за набљудување околу Земјата, но исто така потенцира дека е корисно науката тоа да го провери.
„Колку веројатно е вонземна сонда да се наоѓа на некој од овие орбитирачки објекти? Нормално, крајно неверојатно. Сепак, доколку не кошта премногу пари би требало да се провери. Зошто да не? Дури и да не пронајдеме вонземјани би можеле да пронајдеме нешто друго интересно“, изјави Дејвис за Live Science.