Научниците се загрижени за иднината на океанските екосистеми поради развојот на голема хипоксична зона во Тихиот Океан.
Хипоксичната зона, понекогаш наречена „мртва зона“, е област на океанот во која нивото на кислород е драстично намалено, поради што повеќе не е погодна за живот.
Морските животни обично ја напуштаат областа, а оние што остануваат умираат. Во моментов, оваа хипоксична зона се наоѓа во близина на државата Орегон и зафаќа 20.000 квадратни километри. Но, експертите веруваат дека ќе продолжи да расте, бидејќи овој феномен обично станува поизразен кон крајот на летото.
„Се гушеа на морското дно“
„Се работи за предводник на климатските промени во морето и тоа е затоа што водата сега има помалку растворен кислород отколку порано“, рече биологот Френсис Чан од Универзитетот во Орегон.
„Можевме да видиме морски ѕвезди, морски краставици и ракови среде зоната со низок кислород, кои всушност се гушеа расфрлани на морското дно“, рече Чан.
Потоплата вода раствора помалку кислород
Потоплата вода раствора помалку кислород, што е проблем за океанот, бидејќи температурите продолжуваат да растат.
Чан додаде дека експертите не се целосно сигурни како различните „мртви зони“ во Тихиот Океан ќе влијаат на целокупното здравје на животната средина на долг рок. Но, тие претпоставуваат дека поради климатските промени и глобалното затоплување, сѐ повеќе ќе се среќаваме со вакви „мртви зони“.