Истражувањето спроведено од Технолошкиот институт „Масачусетс“ (МИТ) ја истакнува опасноста од судири на сателити, што е последица на големиот број лансирања и климатските промени.
Новото истражување на МИТ сугерира дека емисиите на стакленички гасови го менуваат просторот во кој се наоѓаат сателитите. Повеќето сателити орбитираат во термосферата, слој од горната атмосфера на Земјата. Овој слој природно се шири и се собира во зависност од активноста на Сонцето, но новото истражување открива загрижувачки тренд. И покрај нивниот ефект на задржување на топлина во долниот дел од атмосферата, стакленичките гасови имаат ефект на ладење на термосферата, што резултира со нејзина контракција, што пак има помал отпор кој може да го попречи природното отстранување на вселенскиот отпад.
Тимот на МИТ предвидува дека орбиталниот капацитет ќе се намали за 50% до 66% до 2100 година, што значи дека популарните орбити би можеле да станат неупотребливи поради пренатрупаноста.
„Горната атмосфера е во кревка состојба бидејќи климатските промени го нарушуваат статус квото. Во исто време, има огромен пораст на бројот на лансирани сателити, особено оние што се користат за широкопојасен интернет од вселената.
Повеќе од 10.000 сателити моментално се во ниската орбита на Земјата, обезбедувајќи клучни услуги како што се интернет и навигација. Брзиот пораст на бројот на сателити доведе до чести активности за избегнување судир. Судирите создаваат долготрајни остатоци, зголемувајќи го ризикот од понатамошни судири.
Големината на термосферата природно флуктуира на секои 11 години поради активноста на Сонцето. За време на периоди на мала сончева активност, таа се лади и се собира, додека во периоди на висока сончева активност се загрева и се шири.
МИТ го проучуваше ефектот врз безбедносниот капацитет на сателитите.
„Повеќе сателити беа лансирани во изминатите пет години отколку во претходните 60 години заедно. Една од клучните работи што се обидуваме да ја откриеме е дали патот по кој одиме денес е всушност одржлив“, рече Паркер.
Научниците симулираа различни сценарија за емисиите на стакленички гасови и нивното влијание врз „капацитетот на носивост на сателитите во ниската орбита на Земјата“. Извршија симулации за да ги анализираат ефектите врз густината и отпорот на атмосферата.
Потоа го споредија идниот орбитален капацитет според различни сценарија за емисија на стакленички гасови, основната линија од 2000 година и сценаријата усогласени со проекциите на IPCC и заклучија дека зголемувањето на емисиите значително го намалува капацитетот на ниската Земјина орбита.
До 2100 година, бројот на сателити кои можат безбедно да работат на надморска височина помеѓу 200 и 1.000 километри може да се намали за 50% до 66% во споредба со сценариото за постојани емисии во 2000 година.
Надминувањето на капацитетот во која било област може да предизвика нестабилност, што ќе доведе до судири и ќе го направи регионот небезбеден за сателити.
Сепак, научниците предупредуваат дека некои орбитални региони веќе стануваат пренаселени.
Атмосферата природно го отстранува вселенскиот отпад, но климатските промени го менуваат овој процес. Тимот заклучи дека контролирањето на емисиите на стакленички гасови е клучно за управување со долгорочниот проблем со орбиталниот отпад.
