Многумина наместо вода пијат засладени пијалаци, но експертите предупредуваат на нивната штетност бидејќи водата, пред сè, му е неопходна на организмот.
Според новото истражување на американски научници, оние учесници кои не пиеле вода дневно внесувале околу 100 калории повеќе од засладените напитоци. Анализирани биле навиките на 8.400 деца на возраст од 2 до 19 години, а во обѕир биле земени и социодемографските фактори. Научниците откриле дека едно од пет деца не пие вода туку само засладени напивки, со што внесува дополнителни 93 калории дневно.
„Тоа што беше изненадувачки е што едно од пет деца и тинејџери воопшто не пијат вода, тие деца внесуваат двојно повеќе калории од засладените пијалаци во однос на децата кои секојдневно пијат вода“, вели д-р Ашер Росингер, автор на студијата.
Иако истражувањето е спроведено на деца, експертите предупредуваат дека и на возрасните луѓе на различна возраст им е потребно повеќе да пијат вода за да ги намалат дополнителните калории од шеќерот, односно засладените напитоци.
Заклучокот е дека секојдневно треба да пиеме вода.
„Ако не пиете вода, веројатно ќе пиете засладени пијалаци. Вака внесените 3.500 калории се еднакви на половина килограм вишок. Тоа значи дека месечно може да се здебелите половина килограм ако наместо вода пиете засладени напитоци, а ако тоа се продолжи на неколку месеци, пресметката е сосема јасна“, предупредува Росингер.
