Тим научници од Универзитетот Вирџинија Тех, објавија труд во кој го објаснуваат начинот на којшто летечката змија се движи низ воздухот, преминувајќи од едно дрво на друго, и тоа прилично големо растојание.
Летечката змија со латинско име Chrysopelea paradisi живее во Јужна и Југоисточна Азија. Новите сознанија говорат дека таа се движи со „лизгање“ низ воздухот. Ајзек Џетон, предводникот на научниот тим вклучен во истражувањето, за CNN објаснува дека овие змии прават брановидно движење додека се движат низ воздухот, слично и како кога се движат на копно. Тој верува дека тоа брановидно движење спречува змијата да се преврти и да падне пред да стигне до целта.
Првата, експериментална фаза се одвивала во лабораторија. Во следната фаза, истражувачите ќе набљудуваат како змиите скокаат од дрво на дрво и како „летаат“ во реални услови, нагласи Џетон.
Истражувањето е објавено во списанието Nature Physics.