Навивачите на Челси преку Twitter ја објаснија грешката со транспарентот во чест на Еден Азар на синоќешниот натпревар против Ливерпул.
Ливерпул славеше со 2:1 на „Стенфорд Бриџ“ на дербито на гости кај Челси, но освен одличната игра и победата на „црвените“, вниманието го привлече и чудниот потег на домашните навивачи.
Пред почетокот на натпреварот навивачите на Челси истакнаа транспарент со кој се величи Еден Азар, играч кој од летово не е дел од „сините“ туку настапува за Реал Мадрид.
„Луѓето мислат дека транспарентот за Азар беше намерно истакнат од страна на MH Stand. Грешка, ништо друго. Потребно е многу работа и организација за вакви нешта, а поради тоа што имаме премногу транспаренти знаевме дека еден ден ќе се случи вакво нешто. Не е идеално, но можеме да си се насмееме сами на себе...“
Од CFCUK Fanzine исто така ја потврдија греешка давајќи и објаснување за тоа како се случила: „Се согласуваме дека беше засрамувачки, но од клубот ни го дадоа погрешниот транспарент. Премногу е комплицирано за да навлегуваме во тоа каква е процедурата, но додека сфатиме дека вадевме погрешен транспарент беше веќе касно. Нема да ни се повтори“.
Азар помина 7 години во Челси играјќи 352 натпревара на кои постигна 110 голови. На двапати ја освои Премиер лигата, еднаш ФА купот, еднаш Лига купот, а двапати и Лига Европа.
