Минатиот месец Малме му крена споменик, а потоа Ибрахимовиќ реши да инвестира во ривалот Хамарби. Тоа ги налути навивачите на Малме.
Статуата на Златан Ибрахимовиќ пред „Сведбанк“ стадионот во Малме беше вандализирана од група навивачи на Малме во знак на револт кон фудбалерот кој одлучи да купи четвртина акции од ривалскиот клуб Хамарби.
Претходно, главата на споменикот беше прекриена со кеса.
Ибрахимовиќ кариерата ја почна во Малме од каде преку сениорскиот тим замина во Ајакс. За Хамарби никогаш не играл туку одлуката да инвестира во тој клуб ја донел поради компанијата AEG чии луѓе ги запознал во Лос Анџелес.
Фудбалерот сметаше дека потегот е на Златан бизнисменот, а не на Златан фудбалерот и дека тоа во Малме ќе наиде на разбирање.
„Имам добри односи со клубот, отсекогаш сум имал. Ова нема никаква врска со мене како фудбалер. Мислам дека во Малме ќе бидат среќни за мене“, рече Ибра говорејќи за Aftonbledet.
Меѓутоа, се излажа. Кавех Хосеинпур, потпретседател на навивачката група на Малме, изјави дека Ибра многу погрешно ја проценил ситуацијата во која самиот се вовлече.
„Не слушнав никој да има позитивни мисли за ова. Сите се екстремно критични. Некои се разочарани, некои налутени, а други мислат дека е идиотски потег. Не е ова радосна вест за нас, тоа е погрешно и прави да се чувствуваме непријатно“, вели Хосеинпур за Fotbollskanalen.
„Изгледа има заборавено што тој значи за Малме. Погрешно проценил кога помислил дека во Малме ќе сме среќни за неговата инвестиција. Не сме среќни. Не верувам дека било кој е ни малку среќен“.
Навивачот вели и дека Златан не е толку голем во Малме колку што самиот смета. Го сакаат поради тоа што е од Малме и тоа што го направил за Шведска, но никој не се шета низ град со дрес од играч кој не игра за нивниот омилен клуб.
„Никој во Малме не се шета низ град во дрес од ЛА Галакси со Ибрахимовиќ на грбот. Тука се шетаме со Росенберг на грбот. Мислам дека тој го преувеличува тоа колку значи тој за нас. Така стојат работите“.
