Веќе испаднатиот калчолигаш игра очајно во последно време, а тоа ги натера најзапалените навивачи на ваков начин да ги предупредат играчите и луѓето во управата.
Отсечена глава од свиња денеска осамна фрлена пред тренинг-центарот „Г.Б. Фабри“ на СПАЛ во градот Ферара. Клубот веќе некое време како ги загуби шансите за опстанок во Серија А и по две сезони во елитата од наредната сезона се враќа во Серија Би.
Но, она што најмногу ги разлути навивачите не е испаѓањето, туку играта на тимот во последните натпревари. Во последните 11 кола СПАЛ има 9 порази и 2 нерешени, а во последните две недели претрпи и високи порази како оние 6:1 од Рома и 4:0 од Интер. Всушност, тимот нема ниту една победа по рестартот на сезоната бидејќи последната ја оствари во март против Парма (2:1).
Покрај главата од свиња, навивачите оставија и порака „Via i porci da Ferrara“ (Свињи, марш од Ферара).
