Трансферот на Ерлинг Хoланд (22) од Борусија Дортмунд во Манчестер Сити не беше толку добро прифатен во Норвешка, а на неодамнешниот натпревар помеѓу Брајн и Бран, гостинските навивачи му испратија жестока порака.
Со транспарентот што го закачија, навивачите на Бран посебно ја критикуваа преселбата на Холанд во Манчестер Сити, кој припаѓа на групацијата Abu Dhabi United, инвестициска групација од Обединетите Арапски Емирати (ОАЕ), земја која со години е обвинувана за кршење на човековите права.
„Браут игра за валкани, крвави пари. Има само еден Холанд", пишуваше на транспарентот на навивач на Бран.
Браут е средното име на Ерлинг Холанд, а со пораката „еден Холанд“, навивачите на Бран алудираат на нивниот млад играч Маркус Холанд (17).
„Холанд не може да ги избегне критиките иако е најголемата ѕвезда. Можеше да избере кој било клуб во светот. Не требаше да избира кој клуб е најлош во однос на ‘спортското перење’", изјави Ерленд Итре Арне Вагане, портпарол на навивачите на СК Бран.
„Спортско перење“ е термин што се користи за земја или компанија која се обидува да го искористи спортот за да ја подобри својата репутација и меѓународниот имиџ. Освен ОАЕ, други земји како домаќинот на Светското првенство Катар, Бахреин и Саудиска Арабија исто така се соочуваат со такви обвинувања.