Фудбалерите на Аргентина со убедлива победа од 3:0 против Хрватска синоќа обезбедија финале на Мундијалот во Катар, што беше повод улиците на главниот град да грмнат со илјадници луѓе за големо славје.
Огромна толпа народ имаше и воочи натпреварот бидејќи истиот се гледаше во живо на неколку локации во градот, по што следуваше огромно славје.
Според материјалите објавени на социјалните мрежи, навивачите најмногу го скандирале името на Меси, а на видеата се добива впечаток деека аргентинската престолнина синоќа се тресела како да имало земјотрес поради целата еуфорија.
Славјето на навивачите траело со часови по завршувањето на полуфиналниот натпревар.
Сепак, јасно е дека Аргентинците уште ја немаат исполнето својата цел, а тоа е освојување на титулата светски шампион, што за нив би била трета по оние во 1978 и 1986.
Нема сомневање дека атмосферата в недела, за кога е закажано големото финале, ќе биде пеколна низ сите градови ширум 47-милионската Аргентина.
За потсетување, Аргентина со головите на Лео Меси од пенал во 34. минута и двата на Хулиан Алварес во 39-тата и 69-тата минута полесно од очекувањата излегоа на крај со досега непоразената Хрватска.
Аргентина вечерва ќе го дознае противникот во финалето откако Франција и Мароко ќе го одиграат второто полуфинале.