Синоќа се одигра натпревар од финалната серија на Источната конференција помеѓу Бостон Селтикс и Кливленд Кавалирс, во кој домашниот тим успеа да стигне до победа и повторно го презема водството, со што направи исчекор кон НБА финалето.
Бостон Селтикс на домашен терен стигна до победа против Кливленд Кавалирс со резултат 96:83 и поведе со 3-2 во серијата.
Составот на Бостон продолжува да го предводи Џејсон Тејтум, кој вчера беше најефикасен во неговиот тим со 24 поени, на кои додаде и 7 скока, 4 асистенции, 4 украдени топки и 2 блокади. Повеќе од солиден беше и Ал Хорфорд со 15 поени и 12 асистенци, а неговото искуство е бесценето на паркетот секоја вечер. Џејлен Браун уфрли 17 поени како стартер, додека Маркус Морис и Маркус Смарт од клупата постигнаа по 13 поени.
Кливленд Кавалирс се во хаотична состојба и никако да стигнат до добар натпревар на гостински терен. Синоќа дури и Леброн Џејмс делуваше без здив и имаше еден од полошите натпревари во овој плејоф со 26 поени и 10 скока, а притоа погоди само една тројка од 6 обиди. Во целиот состав само уште еден играч постигна двоцифрен број на поени – Кевин Лав, кој имаше 14 поени и 7 скока.
НБА финалето изгледа многу далечно за Кливленд Кавалирс и многу е тешко да се поверува дека тим во ваква состојба би можел да направи исчекор и да го победи Бостон во седмиот натпревар, секако, доколку воопшто стигне до седми натпревар.