Синоќа се одиграа последните натпревари од лигашкиот дел од НБА лигата, а многу интересна сцена видовме на дуелот помеѓу Кливленд и Милвоки.
Како и повеќето тимови кои обезбедија пласман во плеј-офот, така и Милвоки на последниот меч ги одмори сите ѕвезди со исклучок на една.
Џру Холидеј беше во стартната петорка на Бакс на гостувањето против Кавалирс и сите беа изненадени од потегот на тренерот Мајк Буденхолцер.
Она што беше уште поизненадувачки е тоа што веднаш на почетокот на натпреварот, по само осум секунди, Холидеј направи прекршок, а потоа излезе од теренот и со насмевка од уво до уво седна на клупата и не се врати во игра.
Но, имаше многу важна причина за овие настани. Поточно 306.000 причини.
Во договорот Холидеј имаше клаузула за оваа сезона во која требаше да заработи бонус од 306.000 американски долари за 67 одиграни натпревари. Пред овој меч, Холидеј на своето конто имаше 66 натпревари, па синоќешните осум секунди му беа доволни да го земе бонусот.
Од овој потег, особено на тренерот Буденхолцер, бил воодушевен и Леброн Џејмс кој го сподели видеото од почетокот на играта и напиша „обезбеди си ги парите“.