Тери Розиер имаше одлични неколку недели, додека Кајри Ирвинг се опоравува од повредата. Неговите бројки се качија во сите статистички категории, посебно во последните три натпревари во кои беше стартер. Но, еден момент на невнимание направи Розиер да изгуби доста пари од договорот кој го потпиша со Adidas.
Во оваа сезона Розиер покажа дека може да биде стартер во повеќето од НБА тимовите, добро заменувајќи го Кајри Ирвинг во стартната постава на Бостон Селтикс.
Една мала грешка, момент на невнимание го чинеше Тери Розиер 300.000 долари, откако неговиот договор со компанијата за спортска опрема Adidas беше раскинат поради неговото непочитување на условите пропишани во договорот.
Розиер се појави на теренот носејќи Nike патики, иако тригодишниот договор кој го потпиша со Adidas на крајот на 2016 година и понатаму го обврзуваше на користење опрема од германската компанија. Само еден ден подоцна, преку FedEx, на неговата домашна адреса стигна известување дека компанијата го раскинува договорот уште веднаш, и дека тој нема да ги земе планираните 300.000 долари.
Во последните неколку натпревари Тери Розиер носи исклучиво Nike патики, и иако не е познато дали оваа компанија планира да му пристапи со договор, тој во секој случај ги задоволува нивните апетити.