Дури 4 натпревари беа на програмата на НБА лигата синоќа, по два од Источната и Западната конференција. Тимот на Хјустон Рокетс обезбеди пласман во втората рунда, додека во Кливленд мечот се решаваше во трилер завршница која беше во режија на Леброн Џејмс.
Тимот на Кливленд Кавалирс пред домашната публика дојде до победа против Индијана Пејсерс со резултат 98:95.
Леброн Џејмс најпрво го блокираше положувањето на Виктор Оладипо, за потоа да отиде на другиот крај на теренот и да ја погоди решавачката тројка со звукот на сирената, која донесе победа за домашниот тим. Со тоа, тој ја заврши вечерта со 44 поени, 10 скока и 8 асистенции, а притоа ги погоди и сите слободни фрлања, што е нетипично за него. Кајл Корвер беше преместен во стартната петорка и тој постигна 19 поени, додека од клупата немаше ниеден играч со двоцифрен број поени.
Во тимот на Индијана Пејсерс потфрлија сите освен Домантас Сабонис, кој мечот го заврши со 22 поени и 5 скока. Најдобриот играч на Пејсерси, Виктор Оладипо, погоди само 2 од 15 шута од поле и на крајот од вечерта имаше 12 поени, 12 скока и 4 асистенции.
Од останатите натпревари вреди да се издвои оној помеѓу Хјустон Рокетс и Минесота Тимбервулвс, во кој домаќините победија со резултат 122:104 и обезбедија пласман во следното коло од плејофот. Торонто Репторс со победа против Вашингтон Визардс стигнаа до предност од 3-2 во серијата, додека Расел Вестбрук и Оклахома Сити Тандер одиграа одличен натпревар и не дозволија да бидат елиминирани од Јута Џез, победувајќи со 107:99.