Синоќа во Кливленд се одигра третиот натпревар од финалната серија во НБА лигата помеѓу екипите на Голден Стејт Вориорс и Кливленд Кавалирс, а во него гостинскиот тим оствари победа и дојде на само еден, последен чекор до титулата.
Тимот на Голден Стејт Вориорс беше поуспешен од оној Кливленд Кавалирс и победи со резултат 110:102, со што го зголеми водството во финалната серија на 3-0.
Во натпревар во кој Стеф Кари и Клеј Томпсон постигнаа помалку поени од Џеј Ар Смит, логично беше друг играч на Вориорс да ја преземе диригентската палка. Токму тоа го направи Кевин Дурент, кој беше незапирлив и вечерта ја заврши со 43 поени, 13 скока и 7 асистенции. Останатите стартери на актуелниот шампион завршија со двоцифрен број поени, меѓу кои Стеф Кари постигна 11 поени, додека Дрејмонд Грин, Џавел Мекги и Клеј Томпсон постигнаа по 10.
На другата страна повторно гледавме сосем очекуван перформанс од Леброн Џејмс, кој забележа уште еден трипл-дабл учинок со 33 поени, 10 скока и 11 асистенции. Кевин Лав во ограничена минутажа од само 31 минута забележа 20 поени и 13 скока, додека Родни Худ конечно доби шанса од клупата и постигна 15 поени, надополнети со 6 скока.
Следниот натпревар се игра вечерта од петок према сабота и тој би можел да биде последен во серијата, со оглед на фактот дека на Вориорс им фали само една победа за да ја освојат титулата.
