Синоќа се одигра вториот натпревар од финалната серија во НБА лигата, помеѓу тимовите на Голден Стејт Вориорс и Кливленд Кавалирс. Домашниот тим лесно одговори на предизвикот, а Стеф Кари постави уште еден рекорд, со кој го доближи неговиот тим до титулата.
Тимот на Голден Стејт Вориорс на домашен терен стигна до победа против Кливленд Кавалирс со резултат 122:103, и со тоа поведе со 2-0 во финалната серија.
Синоќешниот дуел донесе нов НБА рекорд на Стеф Кари, кој уфрли 9 тројки во еден натпревар, за првпат во историјата на лигата. Досегашниот рекорд го држеше Реј Ален, кој во финалната серија со Бостон Селтикс успеа да уфрли 8 тројки. Кари го заврши мечот со 33 поени и 8 асистенции, а многу ефикасен натпревар одигра и Клеј Томпсон, кој шутираше со 61% успешност од поле и забележа 20 поени.
Кралот Џејмс повторно беше клучниот играч на Кливленд и најдобар играч на теренот, па тој го заврши натпреварот со 29 поени, 9 скока и 13 асистенции. Тоа сепак не беше доволно за неговиот тим да оствари победа, бидејќи остатокот од екипата играше многу лоша одбрана и немаше доволно енергија за офанзивно да парира на дрим-тимот на Голден Стејт. Ова финале полека го разбуди Кевин Лав, кој и вчера забележа дабл-дабл учинок од 22 поени и 10 скока.
Наредниот натпревар се сели во Кливленд, а ќе се одигра вечерта од среда према четврток.
