Серијата помеѓу Хјустон Рокетс и Голден Стејт Вориорс ги „краде“ насловните страници од овогодинешниот плејоф, но работите само што станаа далеку поинтересни во другата полуфинална серија помеѓу Портланд Трејл Блејзерс и Денвер Нагетс.
Составот на Портланд Трејл Блејзерс дојде до гостинска победа против Денвер Нагетс со конечен резултат 97:90.
Главната ѕвезда на тимот од Портланд, Демијан Лилард, имаше лоша шутерска вечер, а кога се случува тоа, обично неговиот тим многу тешко доаѓа до победа. Случајот беше поинаков синоќа. Иако Денвер доминираше во неколку аспекти од натпреварот, сепак Портланд подобро ги искористуваше своите шанси и стигна до победа.
Најдобар стрелец на натпреварот беше Си Џеј Мекалум со 20 поени, а Енес Кантер забележа 15 поени и 9 скока. Лилард го заврши мечот со 14 поени, 4 скока и 4 асистенции, но шутираше 5/17 од поле, што не смее да се повтори доколку сака да го однесе неговиот тим во конференциското финале.
Никола Јокиќ забележа дабл-дабл од 16 поени и 14 скока, а на тоа додаде и 7 асистенции. Џамал Мареј повторно беше неефикасен со шутот од поле и постигна само 15 поени, а Малик Бизли од клупата постигна 13 поени.
Вечерва на програмата е дуелот од полуфиналето на Источната конференција помеѓу Филаделфија Севентисиксерс и Торонто Репторс.