Рано утрово по наше време заврши шестиот натпревар од финалната серија на Источната конференција, каде силите ги одмерија екипите на Кливленд Кавалирс и Бостон Селтикс. Домашниот тим славеше пред публиката во Кливленд, а импресивна вечер имаше Леброн Џејмс, кој го предводеше тимот како и во текот на целата сезона.
Тимот на Кливленд Кавалирс оствари победа против Бостон Селтикс со резултат 109:99 и со тоа стигна до израмнување на серијата на 3-3. Седмиот натпревар ќе се игра во Бостон.
Кралот на кошарката уште една го оправда овој епитет со претстава која навивачите сакаа да ја видат од него. Мечот го заврши со 46 поени, 11 скока и 9 асистенции, а посебно импресивен беше неговиот учинок од зад линијата за три поени, од каде шутираше 5/7 за 71,4% успешност. Сите останати играчи од стартната петорка постигнаа 27 поени, од кои Џорџ Хил придонесе за 20 од нив. Двоцифрени беа уште Џеф Грин (14) и Лери Ненс Џр. (10), кои влегоа од клупата.
Составот на Селтикс не може да пронајде одговор за Леброн Џејмс кога натпреварите се играат во Кливленд, но добра вест за нив е дека сепак успеваат добро да се справат со него кога се игра во Бостон. Синоќа најефикасен беше Тери Розиер со 28 поени, додека Џејлен Браун постигна еден поен помалку. Лоша претстава под кошевите имаа Ал Хорфорд и Арон Бејнс, кои заедно фатија 13 скока, а Бејнс воопшто не постигна поени.
Следниот натпревар се игра во понеделник во 2:30 по полноќ и тогаш домаќин ќе биде тимот на Бостон Селтикс. Кој и да победи во седмиот натпревар ќе оди на двобој со победникот од серијата помеѓу Хјустон Рокетс и Голден Стејт Вориорс.