Четири натпревари беа на програмата на НБА лигата синоќа, а плејоф битката дополнително се вжешти откако сите тимови кои досега губеа во сериите вчера остварија победи. Во Сан Антонио се одигра четвртиот меч од серијата против Голден Стејт, каде домашниот тим излезе како поуспешен на крајот на вечерта.
Тимот на Сан Антонио Спарс беше поуспешен од тимот на Голден Стејт Вориорс со резултат 103:90, и со тоа успеа да намали на 3-1 во серијата која се игра до четири победи.
Во отсуство на главната ѕвезда Кавај Ленард, тимот на Сан Антонио цела сезона го предводи Ламаркус Олдриџ, а ништо поразлично не беше ни вчера, кога тој забележа 22 поени и 10 скока и ги погоди сите шутеви за три поени (3/3). Од голема помош му беше и ветеранот Ману Џинобили, кој од клупата постигна 16 поени и беше фантастичен во четвртата четвртина, кога мечот беше најнеизвесен.
На противничката страна се издвои Кевин Дурент, кој забележа 34 поени и 13 скока, но шутираше лошо за три поени, погодувајќи само 4 од 13 обиди од зад линијата. Дрејмонд Грин забележа 18 скока, а му фалеа по еден поен и асистенција за да дојде до трипл-дабл учинок. Земајќи го предвид фактот дека Стеф Кари нема да се врати навреме за оваа серија, нема да биде изненадувачки доколку Спарс ги намачат Вориорс уште на еден натпревар, иако како победник од овој дуел веројатно ќе излезе тимот од Голден Стејт.
Останати резултати:
Милвоки Бакс – Бостон Селтикс 104:102
Вашингтон Визардс – Торонто Репторс 106:98
Индијана Пејсерс – Кливленд Кавалирс 100:104