Синоќешниот распоред на НБА лигата беше исполнет со многу интересни и неизвесни натпревари, но фокусот набрзо се префрли на третиот сезонски пораз на актуелниот шампион Голден Стејт Вориорс, кој беше одбележан со големата расправија помеѓу двете ѕвезди – Кевин Дурент и Дрејмонд Грин.
Тимот на Голден Стејт Вориорс го забележа само третиот пораз во оваа сезона, овојпат беа поразени од тимот на Лос Анџелес Клиперс преку продолжение со резултат 121:116.
Домаќините од Лос Анџелес го имаа натпреварот под контрола во текот на три четвртини, но ја загубија четвртата четвртина со 9 поени разлика и им дозволија на играчите на Вориорс да се вратат во игра навреме за да го однесат мечот во продолженија. Но, надежта на актуелните шампиони набрзо се урна откако Лу Вилијамс постигна 10 поени во продолжението и му ја донесе победата на тимот на Клиперс.
Вечерта сепак беше одбележана од кавгата помеѓу Дрејмонд Грин и Кевин Дурент околу тоа кој треба да го земе последниот шут во регуларниот период, додека резултатот беше израмнет на 106:106. Грин ја поведе топката со себе и не му ја препушти на Дурент, иако тој упорно го бараше тоа од него. Откако двајцата седнаа на клупата расправијата продолжи, а Клеј Томпсон мораше да биде оној кој ги смирува вжештените глави на двете ѕвезди во клубот. Ова не е првпат Дурент да учествува во кавга со негов соиграч – неговиот темперамент е добро познат уште од времето кога играше за Оклахома Сити Тандер.
Дурент го заврши мечот со трипл-дабл учинок од 33 поени, 11 скока и 10 асистенции, додека Томпсон уфрли 31 поен од 31 шут од поле. Кај победничкиот тим најефикасен беше Лу Вилијамс со 25 поени, а неговиот партнер од клупата Монтрез Херел додаде 23 поени за да ја осигура победата на Клиперс.
Останати резултати:
Вашингтон Визардс – Орландо Меџик 117:109
Мајами Хит – Филаделфија Севентиксерс 114:124
Торонто Репторс – Њу Орлеанс Пеликанс 110:126
Чикаго Булс – Далас Маверикс 98:103
Мемфис Гризлис – Јута Џез 88:96
Минесота Тимбервулвс – Бруклин Нетс 120:113
Оклахома Сити Тандер – Феникс Санс 118:101
Сакраменто Кингс – Сан Антонио Спарс 104:99