Фудбалерот на Барселона Лионел Меси во последно време сѐ повеќе го поврзуваат со Пари Сен Жермен откако минатото лето пропадна неговиот трансфер во Манчестер Сити.
Неговиот договор со каталонскиот клуб истекува на лето и од почетокот на јануарскиот преоден рок може да преговара за трансфер со други клубови без обештетување. Веднаш по пристигнувањето во клубот, тренерот на ПСЖ, Маурисио Покетино зборуваше за можниот трансфер на Меси.
„Лионел Меси во ПСЖ? Најдобрите во светот се добредојдени во Париз“, одговори Покетино и додаде:
„Ќе ги оставиме гласините настрана. Ова е моја прва прес-конференција, ќе имаме време за такви разговори.“
Барселона оствари шест победи и две нерешени средби на последните осум натпревари во шампионатот, што го подобри расположението на Меси. Добрата форма и резултати може да го натераат Меси да размисли да остане во клубот. Покрај тоа, францускиот новинар Жулјан Лоран во подкастот TransferTalk на Sky Sports изјави дека доаѓањето на Меси на „Паркот на принцовите“ било тешко изводлив подвиг.
„Со оглед на финансискиот фер-плеј и пандемијата и колку тоа влијаеше на ПСЖ и на сите големи клубови, не знам како – и тоа само кога станува збор за плати - во тимот да го имате Нејмар, чија плата е околу 30 милиони евра, Меси со околу 60 милиони годишно и Мбапе, кој според новиот договор треба да има плата како Нејмар“, рече Лоран, додавајќи:
„Само овие тројца би имале вкупна плата од 150 милиони евра секоја година. Финансиски, тоа не е можно, но во ПСЖ велат дека ќе се обидат, иако сметам дека тоа не е реално“.
