Потпретседателот на „Старата дама“ јавно ги демантираше шпекулациите дека тренерот Андреа Пирло и ѕвездата Кристијано Роналдо ќе си заминат од клубот.
Резултатската криза која владее во Јувентус го турна клубот вон зоната која води во Лигата на шампионите. Оттаму и шпекулациите дека тренерот Андреа Пирло ќе заработи отказ, како и дека Кристијано Роналдо ќе си замине доколку Јуве навистина до крајот не успее да се избори за настап во елитата.
Таквото сценарио го демантираше поранешниот фудбалер и сега потпретседател на клубот, чешката легенда Павел Недвед.
Од популарното шоу „Striscia La Notizia“ беа дојдени во клубот да им ја доделат сатиричната награда Tapiro d'Oro (Златен тапир), но никој од фудбалерите не сакаше да ја прими, а на крајот единствен јунак излезе Недвед кој приликата ја искористи и за да ја искоментира актуелната ситуација.
„Ни се случува еден период на потешкотии, што е нормална работа. Тоа е тоа. Пирло дефинитивно останува, како и Роналдо, одиме заедно до крај“, изјави Недвед и потоа ја прими „наградата“.
И покрај оптимизмот на Недвед, факт е дека Роналдо не сака да биде во клуб кој не би играл во Лигата на шампионите. Но, за било какви претпоставки треба прво да се почека и да се види како ќе изгледа табелата на крајот од сезоната бидејќи Јуве сепак е само еден бод зад 4. место.
