Нејмар го раскина договорот со Ал Хилал откако им зеде 200 милиони евра за 7 натпревари

Славниот бразилски фудбалер Нејмар го раскина договорот со саудискиот Ал Хилал година и пол откако дојде од ПСЖ во трансфер вреден 90 милиони евра.

Триесет и двегодишниот Нејмар на име плата доби 200 милиони евра од Саудијците, но тоа што го покажа на теренот сигурно не ги оправда тие пари.

Имено, за време на престојот во Ал Хилал, Нејмар поради чести повреди пропушти 70 од можни 77 натпревари.

Околу полноќ Ал Хилал објави дека спогодбено е раскинат договорот со Нејмар, а веќе е познат и клубот во кој ќе ја продолжи кариерата, а тоа ќе биде бразилскиот великан Сантус, каде ја започна кариерата.

Иако се очекуваше да оди во МЛС, поточно во Интер Мајами или Чикаго Фајр, Сантус беше најконкретен и навивачите на бразилскиот гигант повторно ќе имаат можност да го гледаат фудбалерот кој им донесе 6 трофеи со 136 голови во 225 натпревари во периодот од 2009 до 2013 година.