Бразилскиот виртуоз вели дека би побудалел доколку целото свое време го посвети на фудбалската игра.
Нејмар ги отфрли обвинувањата дека се однесува незрело и инсистира дека е целосно свесен за неговите обврски кон клубот кој дебело го плаќа, но истовремено не може да престане да се забавува бидејќи во спротивно би полудел.
Кога летото 2017 година ПСЖ го донесе во Париз за неговите услуги плати рекордни 220 милиони евра. Оттогаш Бразилецот постигна 83 гола и 46 асистенции на 101 натпревар за „Светците“, освои и 9 трофеи, но многупати заврши и на насловните страници поради однесувањето вон теренот.
„А кој не сака да се журка? Сите сакаат да се забавуваат. Јас убаво знам кога можам да отидам на забава, знам кога можам да го правам тоа, а кога не можам“, си ја отвори душата Нејмар за ESPN.
„Луѓето мислат дека сум незрел, дека не знам што правам, напротив, многу добро знам. Веќе години како сум во фудбалот. Ако останам 100 проценти фокусиран само на играњето фудбал, мислам дека би побудалел. Има време кога е потребна релаксација, смиреност... Никогаш нема да престанам да се журкам“, вели тој.
Нејмар секоја година одржува голема роденденска забава на која кани куп фудбалери како и други познати личности. Минатата година заради таквата забава се спречка со тогашниот тренер Томас Тухел кој обвини дека таквите настани се непотребни застранувања за неговиот тим.