Бразилецот Нејмар ќе отпатува во Јужна Америка на квалификациите за СП, и покрај тоа што се здоби со повреда на натпревар за Пари Сен Жермен во Лигата на шампиони.
Селекторот на Бразил, Тите, го покани напаѓачот Фламенго Педро на натпреварите против Венецуела и Уругвај, на 13 и 17 ноември, но не го отстрани Нејмар од тимот.
Докторот Родриго Ласмар рече дека очекува Нејмар да биде подготвен за мечот со Уругвај, „по една недела интензивен тренинг“ за селекцијата на Бразил во кампот во Терезополис кај Рио де Жанеиро.
„Има шанса да се опорави за вториот натпревар. Ние внимателно ќе го следиме развојот на ситуацијата“, изјави Ласмар за веб-страницата на Фудбалската конфедерација на Бразил.
Тренерот на Пари Сен Жермен, Томас Тухел, минатата недела изјави дека ќе биде „невозможно“ Нејмар да игра за Бразил, бидејќи тој уште се опоравува од повредата.
Селекторот на Бразил има проблеми со тимот затоа што се повредени Филипе Кутињо, Фабињо и Родриго Каио.
Во квалификациите за Јужна Америка, Бразил и Аргентина водат со по две победи во две кола.