Од почетокот на епидемијата на новиот коронавирус досега, американскиот претседател Доналд Трамп излегува со различни ставови во врска со опасноста и сериозноста на ситуацијата.
Кон крајот на јануари, тврдеше дека неговата забрана за влез на патници од Кина „стави крај“ на опасноста за САД и не прекинуваше да се фали дека неговата администрација одлично се справува во контролирањето на ширењето на вирусот низ земјата.
Самоуверено и лежерно известуваше дека во САД има само петмина заболени, па 15, па повеќе, додека не ескалираше со драстична промена на ставот и тонот кога прогласи итна состојба и забрана за патување од и кон Европа.
Во меѓувреме се премисли и за ефикасноста на социјалното дистанцирање, споредбите на COVID-19 со обичен грип, носењето маски и за тоа колку долго ќе трае пандемијата, а со тоа и кризата.
Во едно видео се срочени сите негови изјави и може да видите како Трамп „ја смени песната“. Она што навистина загрижува е фактот дека претседателот на една од најмоќните земји во светот е постојано „изненаден“ од развојот на ситуацијата дома и светот, игнорирајќи ги препораките и искуствата на другите земји.
